(جناح ام جكو) مكي حمدالله يكتب .. حنبنيهو

لو صاح دايرين نبنيه البنحلم بيه يوماتي وطن حدادي مدادي وطن عاتي.

اولآ دعونا نتصالح بيننا وبين أنفسنا ونصفي ضمائرنا.
سوداننا الحبيب الان في وضع خطير جداً يجب علينا جميعاً أن نتكاتف وندعم هذه الحكومة فقط من أجل أن نخرج الوطن من هذا النفق المظلم.

وحكايت الدولة العميقة والكيزان هم سبب الازمات ودا شيوعي ودا اسلامي الأفكار السامة دي لو ما شلناها من راسنا ما ح نمشي قدام خطوة واحدة وح نهدمه بأيدينا بدل حنبنيهو.

اي زول حريص علي مصلحة الوطن حقوا يفتح عيونوا كبار وينظر إلى الوضع الحاصل في البلد بعين العقل
وبقدر الإمكان حاول أن تخرج بنتائج من خلال قراءة المشهد السياسي
سياسياً نحن بنمر بفترة حرجة في تاريخ السودان المعاصر والحديث وتخبط سياسي وخمج وسوء في إدارة ماعون الدولة ناتج عن ضعف الإمكانيات وتكالب الازمات وانهيار الاقتصاد.

عشان كدا ياشفاتة وياكنداكات حقوا ندعم حكومة حمدوك ونقيف معها في خندق واحد رغم الفشل وكلنا عارفين سبب فشل حكومة الثورة
وماتنسوا انو برهان وحمدوك وحميدتي وكل مسؤول في الدولة دي موظف عند الشعب والشعب هو البيدفع لهم مرتباتهم ونثرياتهم ومخصصاتهم .

فقط ينقصنا عشان نبنييهو هو تصفية ضميرنا وإزالة الكوز الفي داخلنا
تاجر جشع فهو كوز
صاحب الحافلة البيزيد تعرفت المواصلات كوز

كل البلاوي دي الحكومة براها مابتقدر ليها  ماتغشوا نفوسكم ساي وماتشبكونا شكراً حمدوك وحنبنيهو وانت حق خدمة النت شايلوا من ابوك والواحد فينا فلاحتوا كلها انوا يحرق لستك
ولو منتظرين الحكومة تدرسنا وتزاكر لينا كدا مابننجح.

هذا الفشل الزريع الذي اغرت به حكومة حمدوك الشعب جزء لا يتجزء منه ، والله البشوفنا في المواكب وزمن الاعتصام يحلف يقول الشعب دا ما حيبنيهو بس دا حيعمل من السودان جنة في الارض.

عليكم الله ياشفاتة ويا كنداكات ما تشمتوا فينا أعداء الثورة.

قبل كم يوم كنت قاعد مع واحد كان مسؤول كبير في زمن النظام البائد الزول دا قال لي والله انا لهسي ما متخيل انوا حمدوك دا يكون قاعد كنت متخيلوا شهر ما بتموا وحيشيل شنتطوا ويتخارج مكان جانا قلت ليهو السبب شنوا قال لي حمدوك استلم وكانت البلد تكاد تكون معدومة كل شئ وبنك السودان ناشف دولار واحد مافيه والأزمات والحروب الشاننها ضدوا محاصراه من جميع الاتجاهات قال ياخ الزول دا عكليت شديد ماعارف العكلتة والصبر دا جايبهم من وين طبعا في اللحظة دي أنا كثورجي راسي بقي كبير وقلت ليه متزكر الثوار البقولوا صبا سنة واقفة قنا إعتبر حمدوك دا واحد منهم خلينة من ديل قلت ليه تتزكر الثوار الاستشدوا في كوم الحجارة قال أي قلت إعتبر حمدوك واحد من الناجيين منهم .

طبعاً الزول دا كوز بس من الكيزان المقتنعين أنو لاعودة للكيزان للحكم مجدداً.
قلت ليه عليك الله بيني وبينك كدا ماعندكم امل ترجعوا تاني قال والله وبكل صدق كان عندنا امل بس بعد مليونية (٣٠يونيو ٢٠١٩) أنا شخصياً اقتنعت انوا بعد اليوم دا نحن أصبحنا غير مرغوب فينا والشعب دا تاني بالقوة ما بتحكم.
وشهد شاهد من اهلها ، والله حقيقة نحن شعب معلم بس محتاجين توعية ومذيد من الصبر عشان نطلع من هذا النفق المظلم سالمين واكيد حنبنيهو.

لاله إلا أنت سبحانك إني كنت من الظالمين