أعمدة الرأي

( جناح ام جكو ) مكي حمدالله يكتب ….

مليونية هيكلة الاخلاق و الضمير

اسئل ليك اي شافع جنبك هسي وقول ليه هوي ياكوز اكيد ح يقول ليك أنا ماكوز كوز انت ولو ما قال ليك كدا وفرح وانبسط علي اساس انو كوز إذآ أنا غلطان وحاعتزر لكل كوز .

من الاخر كدا ومن غير جرجرة كتيرة وشرح ذهب نظام الكيزان وترك لنا فساد وعدم اخلاق في كل مكان.
صاح هم مشوا بس زرعوا في نفوسنا أمراض مزمنة ومستعصية لايمكن أن نشفي منها إلا بسن قانون رادع لكل من تسول له نفسه استقلال المواطنين وإزلالهم
لايمكن أي سلعة و أي شيء عندو علاقة بالمواطن بينهم في سمسار ياخ ديل قايلين الخلق غلي السماسرة مافضل ليهم الا الأوكسجين ما اتحكموا فيه .

اللبن بعد أن يحلب من بقرته الكلام دا في المزرعة عندو سمسار وفي ضهر البوكسي عندو سمسار ومن البوكسي للكارو عندو سمسار ديل مافضل ليهم الا يقعوا جوة حلة اللبن .

الشئ المهم الاخلاق و الضمير بقت مافي وأي زول داير يبقي غني علي حساب الاخر ولو بي كوم من الحجارة .

أصحاب الدكاكين في الحلة اي واحد فيهم عندوا سعر خاص بيه
بتاعين الخضر والفاكهة اي واحد فيهم بقطع من راسو ولو سئلتوا قلت ليه لي الحاصل شنوا يتفاصح ويتفلس ليك تقول طماطمو دي جايبها من الصين والبرتقال جايبو من هولندا وساقينو موية ورد في حين انو الخضروات والفواكه العندنا البتشيلها عربات النفايات اكتر من المفروشة في الأسواق.

الحركة دي نظام نخليها تبوظ ولا نرخصها ليكم ونخرب طبعكم
الحاجات دي كلها هينة وبتتجاسف و ممكن عادي تخليها مابتفرق معاك كتير بس الأدوية ماعندها حل مسئلة حياة أو موت لو عندك زول عيان وكاتبين لية روشتة أدوية كتيرة الهم بكتلك تلف مية صيدلية اي صيدلية فيهم عندها سعر البقول ليك السبب من ارتفاع الدولار واخر يقول ليك الأدوية معدومة ووو أمس القريبة دي كنت مع أحدهم عندوا التهاب ونزلة قلت ليه عملت ليها شنوا قال لي بلعت اموكلاند وكان عندي نفس الاعراض قلت ليه طيب ارح معاي الصيدلية الكلام دا المساء دخلنا الصيدلية قلت للصيدلي داير اموكلاند قال لي (٦٠٠ جنيه ) الزول المعاي نطط عيونوا وقال للصيدلي قبل ساعتين شلتها منكم ب (٤٥٠ جنيه ) وكانت قاعدة مكانك دا بنت معقولا البضاعة العندكم انتهت وجبتوا واحدة جديدة ولا نفهم شنوا قال لينا الدكتورة الكانت هنا غلطانة وماعارفة الاسعار قلت ليه الدكتورة ماغلطانة أصلا صيدلياتكم كلها بقت لينا زي نتيجة المباراة في شاشة التلفزيون ممكن تتغير تحت أي لحظةعادي لكن تتغير بين الشوطين دي صعبة شديد وما بتخش الرأس والله دي ريال مدريد ماعملها تاني ماعندنا معاكم حل إلا يعملوا ليكم ڤار عشان نعرف ذياداتكم دي حقيقة ولا تسلل
الشعب السوداني سقط كيزان السلطة فاضل ليه يسقط كيزان السوق والسماسرة وضعاف النفوس المريضة .

كل البلاوي دي رمونا فيها الكيزان في عهدهم الفاسد حتي النمل علموه السرقة .
عشرة سنة قدام لو لا قدر الله اي مسؤول سرق ليه قطعة أرض او اتهموه بفساد طوالي بنقول ليه معليش انت ما عندك ذنب واكيد كنت تربية كيزان قريب دا تاني راحة معانه مابتلقوها وح نكرهكم اليوم الفصلتوا فيه الجنوب واليوم الدمرتو فيه مشروع الجزيرة واليوم البعتوا فيه خط هيثرو وطوالي ح نذكركم بنتانة افعالكم المابتشبهنا.

لإله إلا أنت سبحانك إني كنت من الظالمين

( جناح ام جكو ) مكي حمد الله يكتب …


إضغط هنا للإنضمام لمجموعات نبض السودان على واتساب

إقراء أيضاً:

اترك رد

زر الذهاب إلى الأعلى